გასტრონომიული ტური სვანეთში

      
საქართველოს გასტრონომიის ასოციაცია ამჯერად თოვლიან სვანეთს ესტუმრა. რეგიონი ცნობილია ისტორიული კოშკებითა და მთიანი რელიეფით. ტრადიციული, რიტუალური და ავთენტური გემოების გაცოცხლება სწორედ ავთენტურ გარემოში მოხდა. დალი ცატავამ გააცოცხლა და მკვიდრებს გააცნო ის მივიწყებული სვანური კერძები, რომლებიც რეგიონის მკვიდრთაც კი მივიწყებული ჰქონდათ.

გასტრონომიის ასოციაცია ლახამულაში ჭკადუების ოჯახს ეწვია. აქ გავეცანით ადგილობრივი ყველის, ნარჩვის მომზადების ტექნოლოგიას. სვანეთი განთქმულია თავისი ცივი კლიმატით, სწორედ ამიტომ საჭირო იყო ყველის მარაგი. მამაკაცები ამზადებდნენ ყველის შესანახ ხის ყუთს, ხოლო ოჯახის დიასახლისები მასში ათავსებდნენ ჭყინტ ყველს, შემდეგ პრესავდნენ და თავზე მძიმეს ადებდნენ. გასტრონომიული ტურის ფარგლებში გაირკვა, რომ ყველის ეს სახეობა სვანეთშიც კი ცოტამ იცის. სწორედ ამ ყველით მომზადდა ცნობილი სვანური რიტუალური  ხაჭაპური. საქართველოს გასტრონომიის ასოციაციის ერთ-ერთმა წევრმა, ყველია მკვლევარმა ანა მიქაძემ კი იზრუნა, რომ ყველის ეს სახეობა უფრო ფართო მასშტაბებზე გასულიყო.

სვანური წვნიანი "ლუცფექ"
მოგეხსენებათ სვანეთი ცნობილია თავისი ცივი კლიმატითა და თოვლიანი მთის ფერდობებით, სწორედ ამიტომ, ადგილობრივი მოსახლეობისათვის განსაკუთრებით მნიშვნელოვანია ისეთი კერძები, რომლებიც სავსეა ვიტამინებით და კარგად მოქმედებს იმუნურ სისტემაზე. სწორედ ასეთია ცნობილი სვანური წვნიანი ლუცფექ, რომელიც შეზავებულია ნივრითა და წიწაკით. იგი რეკომენდირებულია გაციების ან ბახუსის დროს. სვანების თქმით, თუ წვნიანს 16-ჯერ მიიღებ, მაშინ მთელი წლის განმავლობაში ვერანაირი ვირუსი ვერ მოგერევა.

ჭლაკვიანი ხაჭაპური სვანეთის რეგიონისათვის დამახასიათებელ გულსართიანს წარმოადგენს. ეს არის კერძი, რომელიც ცდება რეგიონის კუთვნილებას და საერთო, ეროვნული მნიშვნელობა გააჩნია, რადგან ხაჭაპური დღეს საქართველოს არამატერიალურ ღირებულებას წარმოადგენს. 

"არ არსებობს ტრადიციები კერძის გარეშე! " - ამბობს ქალბატონი დალი ცატავა. მართლაც, საქართველოს ისტორიაში გასტრონომიას უდიდესი ადგილი უჭირავს. ამ სფერომ ბევრი ბრძოლა და ტრანსფორმაცია განიცადა, რის გამოც საზოგადოებამ თითქოს მიივიწყა ის უნიკალური და ავთენტური გემოები, რომელიც საქართველოს თითოეულ რეგიონს გააჩნია.

გასტრონომიის ასოციაცია ცდილობს დაუბრუნოს საქართველოს მისი ეროვნული ღირებულება. გააცოცხლოს მივიწყებული ტრადიციები, სწორედ ამიტომ ტარდება სხვადასხვა ტიპის კვლევები და მუშავდება ისტორიული ღირებულების სამეცნიერო ნაშრომები.
გასტრონომიულ ტურიზმს არა მხოლოდ ეროვნული, არამედ კომერციული ღირებულებაც გააჩნია,  მთელი მსოფლიოს მასშტაბით ის ტურიზმის  ერთ-ერთი მომგებიანი სფეროა, რომელიც არა მხოლოდ ცნობადობას, არამედ დამატებით შემოსავალსაც მოუტანს როგორც რეგიონში მცხოვრებ მოსახლეობას,  ასევე ქვეყანას.