გასტრონომიული ტური კახეთში

საქართველოს გასტრონომიის ასოციაცია, ტურიზმის ეროვნულ ადმინისტრაციასთან ერთად ტურიზმის ხელშეწყობის მიზნით გასტრონომიულ ტურებს ატარებს. ეს პროექტი ხელს უწყობს რეგიონის გასტრონომიული შესაძლებლობების პოპულარიზაციას და ძირძველი გემოებისა და კერძების გაცოცხლებას.  სამეგრელოს შემდეგ, გასტრონომიის ასოციაციამ გეზი კახეთისაკენ აიღო.          
                                              

"კახეთს დაღესტანი ესაზღვრება და აქედან გამომდინარე მას ძალიან ბევრი გაჭირვება აქვს გადატანილი, სწორედ ამიტომ შემოსევებისაგან დატოვებული კვალი გემოებშიც აისახება, ბევრი რამ არის ნაზავი, კახელები როგორც თვითონ არიან დინჯები, გაწონასწორებულები, სწორედ აი ასეთი ნეიტრალური და კლასიკური გემოები აქვთ“ : - აცხადებს საქართველოს გასტრონომიის ასოციაციის პრეზიდენტი დალი ცატავა.

ეკა დუღაშვილმა ოჯახის ეზოში დაკრეფილი მცენარეებით შეზავებული სანელებლები დაგვახვედრა, რადგან უკეთ შეგვეგრძნო ნამდვილი კახური, ავთენტური გემოები. ოჯახის დიასახლისმა პაპამისის დროინდელი რეცეპტები გააცოცხლა და თბილისიდან ჩასულ მზარეულებს გაანდო.

პირველი კერძი გახლავთ ჭარხალი კახუად. კერძის მომზადებისთვის საჭიროა პამიდვრის საწებელისა და ტყემლის შეზავება, ნიორი და რაც ყველაზე მნიშვნელოვანია ოჯახში მოყვანილი მცენარეებისაგან დამზადებული სანელებლები, ყვითელი ყვავილი, დაფქვილი ქინძი, ქონდარი და ველური ომბალო, რომლის დაკრეფაშიც მას თბილისიდან ჩასული მზარეულები დაეხმარნენ. რეცეპტს განსაკუთრებით პიკანტურს ხდის შინდი. სანამ საქართველოში პომიდორი მოიკიდებდა ფეხს, რეგიონი საკვებს ბროწეულით ან შინდით აზავებდა.

ამის შემდეგ, ჩვენ გავეცანით დანდურს,

რაც გრილი სალათის ნაირსახეობას წარმოადგენს. კახეთი ცხელი კლიმატით არის ცნობილი, ამიტომ ასეთი კერძი აქ განსაკუთრებით ფასობს. დანდური, ვაზის მეგობარი მცენარეა და მის ძირში იზრდება. მას ბევრი სასიკეთო და სამკურნალო თვისება გააჩნია. როგორც ეკა დუღაშვილი ამბობს, მისი მომზადება ძალიან მარტივია, მოხარშულ დანდურს ემატება ღვინის ძმარი და დანაყილი ნიორი, თუმცა გემოს პოლიფონიაც სწორედ ამ მარტივი ინგრედიენტების ზომიერი შეზავებით და რა თქმა უნდა ადგილობრივი პროდუქტებით იქმნება.

გასტრონომიის ასოციაციამ ლაგოდეხში გადაინაცვლა, რეგიონი განთქმულია ხორცის სიყვარულით. ლაგოდეხში კახეთის რეგიონისათვის დამახასიათებელი, უგემრიელესი ჩაქაფული მომზადდა. იმისათვის რომ ჩაქაფული მომზადდეს, ქვაბის ძირში შედარებით ცხიმიანი ხორცის ნაჭრები იდება, ხოლო ზემოდან ფენა-ფენა ემატება ტარხუნა, მწვანე ხახვი, ქინძი, ნიორი და ტყემალი. შემდეგ მას ღვინოს ასხამენ და ნელ ცეცხლზე შუშავენ.

ცნობილია, რომ საქართველოში ყველაზე გემრიელი მწვადი კახეთში კეთდება. ეს არის რეგიონისათვის დამახასიათებელი, ავთენტური კერძი. ლაგოდეხში, მისი სპეციფიკურობა დეკას ფოთლებში იმალება, რომელიც ნაკვერჩხალში იყრება. აღსანიშნავია, რომ მცენარე დეკა მხოლოდ ლაგოდეხში და სვანეთში მოდის. დალი ცატავა კახური მწვადის უნიკალურობის აღნიშნვისას საუბრობს კახური ღორის სპეციფიკურ ჯიშზე, რომელიც განსაკუთრებულია, იგი ტყეში რკოთი, წაბლითა და კაკლით იკვებება, სწორედ ამიტომ მარტივად იდებს ხორცს და გამოირჩევა სპეციფიკური დინგით. მწვადის შამფური კახეთში შეიძლება ყოფილიყო თხილისაგან, ან დეკას ბუჩქისაგან დამზადებული. ისტორიის თანახმად, სწორედ ასეთ მწვადს მიირთმევდა მეფე ერეკლე II.

საქართველოს გასტრონომიის ასოციაციის პრეზიდენტმა, დალი ცატავამ საინტერესო ისტორია გააჟღერა. ცნობილი რუსი პოეტი, სერგეი ესენინი, კახეთში სტუმრობის დროს გაოცებულა მისი სილამაზითა და უნიკალურობით. როდესაც უკან ბრუნდებოდა, მან მანქანიდან დაინახა კაკლის ძირში მოქეიფე კახელები და სთხოვა რომ მათთან ერთად ექეიფა. შუა ქეიფის დროს პოეტი ცხარე ცრემლებით ატირდა. როგორც შემდეგ განმარტა, იგი გაოცდა კახელების სადღეგრძელოებით. „მე ვარ პოეტი და ესენი არიან გლეხები?“

ქართული სამზარეულო უნიკალურია, ყოველ რეგიონს გააჩნია მისთვის დამახასიათებელი გემოები. ამიტომ საჭიროა ვიცნობდეთ და არ ვივიწყებდეთ საკუთარ ტრადიციებს, არამედ ვავითარებდეთ და ვაუმჯობესებდეთ.

საქართველოს გასტრონომიის ასოციაცია აგრძელებს გასტრონომიული ტურიზმის ხელშეწყობას და შემდეგი ლოკაცია სვანეთი გახლავთ.